.
قصيدة بمناسبة إستشهاد أمير المؤمنين ،
علي بن ابي طالب عليه السلام .
-{ المستهل }-
الليله ديــن الله انجتــل وكتــابه
من وگع حامي الحمه ابمحرابه
ـــــــــــــــــــــــــــــــــــــــــــــــــ
شلون سور الدين بالسيف انجتل
ونطبر راسه ونزف خير العمل
والله وسفه ينغـــدر هـذا الفحل
ومن دمه الهامه يصير خضابه
ـــــــــــــــــــــــــــــــــــــــــــــــــ
والله عجبه جيف هامه ينطبر
وسالت ادمومه على هام الصبر
انشاهـد الليله فتح صدره الكبر
ينتظر حيدر يشرف اترابه
ـــــــــــــــــــــــــــــــــــــــــــــــــ
ليش أسد غالب تغيب بالدمه
بفضله تشهدله غدت ارض وسمه
ياهضيمه يطـيح حماي الحمه
ظل ينــوح السيف لمن صابه
ـــــــــــــــــــــــــــــــــــــــــــــــــ
ايخلده التاريخ حماي الدخيل
قانع الكرار قابل بالقليل
الليله حيدر عالسفر انوه الرحيل
بيا وضع حيدر يودع احبابه
ـــــــــــــــــــــــــــــــــــــــــــــــــ
منه خل تاخذ درس أهل الوفه
حيدر الله مكرمه ومشرفه
أبعلي وصه الصحابه المصطفه
تالي ما نفذوا وصيته اصحابه
ـــــــــــــــــــــــــــــــــــــــــــــــــ
ما وفت ويه علي أهل الرده
ظلت اعلـيه ابحقدها امجنده
أول الاسلام من حيدر بده
جانت الناس بوكتها اذيابه
ـــــــــــــــــــــــــــــــــــــــــــــــــ
غصبن اعليهم يظل حيدر أمير
يبقه الاول عدنه حيدر ولاخير
مثل حيدر ياهـو كاعد عالحصير
ياهـــو مــثله مــــركـــعه أثيابه
ـــــــــــــــــــــــــــــــــــــــــــــــــ
علي ما فرق أبد بين الثنين
الناس مشاها عدل اربع سنين
كلمن أتعنه لمير المؤمنين
ما يرد خايب تره الـدك بابه
للشاعر الحسيني
احمد مهدي الخفاجي
ليست هناك تعليقات:
إرسال تعليق