قصائد مكتوبة | الشاعرة ام معتصم الذبحاوي | بت حيدر الكرار

مظلومه ماتت مهظومه عاشت
بت حيدر الكرار
رغم المصايب رغم النوايب
رغم الجره والصار
جبل راسي ابصبرهه بقت لاخر عمرهه
* * *
بقت مثل الجبل زينب 
رغم كل الجره اعليهه
حزينه اوصابره اعله الهم
تحيّر كل وصف بيهه
رياح الهم عواصفهه
عصفت والغدر بيهه
حين الخلصو اخوتهه
وماظلت زلم ليهه
مثل الرواسي زينب تقاسي 
ابسكته اودمع همال
ترعه اليتامه ابدال النشامه
وتحامي هالأطفال
مابيّنت قهرهه بقت لاخر عمرهه
* * *
مهمه اوكلفه والحره
كَضتهه اوحامت العيله
اوجذب من كَال عالحره
العقيله زينب اذليله
شجاعه اوقاومت طغيان
للطاغي اهدمت حيله
اوخطبتهه على الطاغي 
سيف اومنهه ياويله
كل كلمه منهه تبيّن حزنهه
واتهد عروش ايزيد
اتصم البوادي لمن تنادي
يبن امي آ يالحيد
ذكر حيدر ذكرهه بقت لاخر عمرهه
* * *
تمثّل حيدر الكرار
ببلاغتهه اومعانيهه
خطبه اوهزت العالم
اوفضحت كل طواغيهه
البست ثوب الحزن جلباب
افصال امفصل اعليهه
اورياح العاصفه بالهم
فلا تكَدر تلاويهه
مثل امهه خطبت للأمه ظلت
ترويهه جيلٍ جيل
تحمل معاني السبعه المثاني
والتورا والإنجيل
من ينكر خبرهه بقت لاخر عمرهه
* * *
رباة المرتضى حيدر
عقيلة هاشم الحره
بت فاطم تظل للدوم
لكل مؤمن وفي عبره
خدرهه المايفاركَهه
حته ابكربله الكَشره
نتعلم مثلها اتريد
بت حيدر وابو العتره
تبقه العظيمه رغم الهظيمه 
محشومه بت اكرام 
بغياب اهلهه وفكَد الكفلهه
ماطخت ابداً هام

حاربهه دهرهه بقت لاخر عمرهه

الشاعرة الحسينية 

ام معتصم الذبحاوي