قصيدة -{ أسرار }- اسرار بالغاضريه ..

قصيدة -{ أسرار }-
اسرار بالغاضريه .. اخبار بالغاضريه
_ _ _ _ _ _ _
وكف يمها الزمن واحتار وياهه
اسرار الإمامة الما عرفناهه
_ _ _ _ _
واجب لو حجينا نحدد الابعاد
عن سر الامامه العد علي السجاد
خله الطف قضيه بكل زمن تنعاد
وثوره تحارب الطغيان خلاها
_ _ _ _ _
حضر دفن الامام وغسله بدمعه
لكَه آثار حوافر نابته بضلعه
ومكَطوع النحر ريحانه البضعه
عاري و جثته التربان غطاها
_ _ _ _ _
مسح عنه التراب وقبله بنحره
حضن جسمه الشريف وشم عطر صدره
وقاموا اول عزاء لفاطمه الزهره
وبراس النبي المكَطوع واساهه
_ _ _ _ _
كل معصوم ندري يصلي عالمعصوم
الشريعه من الاله الواحد القيوم
على حسين السبط محد عرف لليوم
اشلون بكريلا السجاد صلاها
_ _ _ _ _
صلاها امامي وما تركها تفوت
ولا خله الرساله بموت اهلها تموت
اذا حركو خيم حركو قبلها بيوت
ناس وضد علي الشيطان غذاها
_ _ _ _ _
كلما صار بالطف ضد محمد صار
حصار المر محمد مر بأبو الاحرار
ما يكَدر يزيد بخيمه يشعل نار
والما شاف قبله ابليس سواها
_ _ _ _ _
نفس هاي السلالة كل زمان تعود
يزيد بغير اسم يذبح تره وموجود
بعد ذاك الحقد والنار والنمرود
بأفعال النواصب كلها شفناها 

كلمات الشاعر الحسيني
ناظم الحاشي 

من مجهود الشاعر ذو الفقار الحيدري
مجلة الرواديد و الشعراء