يالغايب حزينة الطفلة وتنشدك
يالغايب سبية وحك علي جدك
يالغايب رقية تنتظر وعدك
**********
ثلاث سنين عمرهة وياهي من اعوام
ثلاث اجروح خذنهة العالم الالام
مصاب بكربلة وبالكوفة وارض الشام
يغايب بالغرب عين اليتيمة اتنام
ومصايب لفنهة من صغر سنهة
ومصايب سبية ونادت بونهة
يالغايب رقية تنتظر وعدك يالغايب
*********
عليهة اول مصيبة ابكربله مرت
شكثر بالطف نوايب شافت وحضرت
تصد فوگ الرمح راس الابو ونظرت
انفتح جرح المآسي وبالاسى اتكدرت
وتراقب ابوهة امگطع اموذر
وتراقب گلبهة من الحزن يسعر
يالغايب رقية تنتظر وعدك يالغايب
***********
كُبَر جرح اليتيمة الكوفة من راحت
وعلامات الحزن فوگ الوجه لاحت
صغيرة وباليسر مهظومة لن صاحت
لبوية ما تردوني ابدمع ناحت
وتخاطب اهلهة وتسچب الدمعة
وتخاطب يبوية ما الك رجعة
يالغايب رقية تنتظر وعدك يالغايب
***********
مصيبة من مشت بالقافلة اميسره
ابطريق الشام طريق الفاجعة الكبره
بسبي ليزيد خذوهة ودخلت القصره
مشت مره بشتيمة وتنضرب مره
وتعاتب يغايب إلمن الطفله
وتعاتب بگت محتارة منذهله
يالغايب رقية تنتظر وعدك يالغايب
*********
يغايب والرجس لا مالة حد جرمه
سباهة ورد عليهة الظالم ابظلمه
يزيد اصدر عليهة بالحقد حكمه
وسط ليل وخرابة تگعد وعتمه
وتحاسب يمهدي الظالم ابعدلك
وتحاسب بخرابة يا وسف اهلك
يالغايب رقية تنتظر وعدك يالغايب
**********
رقية وبالحلم شافت ابوهة حسين
صحت مفزوعة واتسائل ابوية وين
عليه ذايب گلبهة ومنگسم نصين
يتيمة اتحن لابوهة وتجري دمع العين
ظل ذايب گلبهة وتشكي مهضومة
ظل ذايب لابوهة المنه محرومة
يالغايب رقية تنتظر وعدك يالغايب
************
اعتله صوت المناحة والرجس يسمع
اُمَر راس الابو اتشوفه عسى تهجع
تصد مذهولة راسه وتهمل المدمع
ومن المنظر هوت ساعتهة بالمصرع
دم لاهب جرت زينب مدامعهة
دم لاهب العقيلة نادت اسمعهة
يالغايب رقية تنتظر وعدك يالغايب
الشاعر الحسيني
أنيس الخفاجي الكربلائي
مجلة الرواديد و الشعراء
ليست هناك تعليقات:
إرسال تعليق