باب المراد -- من عنده اطلب حاجتك
من الجواد -- تاخذها بـــــيدك طلبتك
------------
شفنه شاراته شكثرها للجواد وشفنه نوره
ياهو من عسر الزمان وعنده متعسره اموره
يعتني الباب المراد ابنيته صادق من يزوره
لله ويوجه دعائه تنگضي ويكثر سروره
لمن تطب ---- بالعتبه عفّر غرّتك
باب المراد ---- بسم الله يگضي حاجتك
---------------
جنتّه هذي تشاهد للجواد العنده شاره
والذي عنده عليل او للشفه مل انتظاره
والذي معوز يعيش بعيشته قل اصطباره
منه يطلب بيده ياخذ مايقدمله اعتذاره
الوادم تشوف ---- تفرح بثغرك بسمتك
باب المراد ---- بسم الله يگضي حاجتك
-----------------
للجواد اتشوف نوره وللافق يضوي سراجه
كل ملك چان اليزوره ابعتبته يحنيله تاجه
ويعتني البيه علّه يمه العلته ياخذ علاجه
ايحصل امراده اليريده البلجواد لله ناجه
يل تعتنيه ---- اعگدها يمه رايتك
باب المراد ---- بسم الله يگضي حاجتك
----------------
هالزمن شاهد عليهم هالجوادين الايمه
ياهو هم اچبير عنده لو دخل يجلوله همه
رحمة الله الوسيعه او للحوايج باب همه
وللجواد العنده حاجه او مشكله بيها يكلمه
من الفؤاد ---- سولفله عن هم دنيتك
باب المراد ---- بسم الله يگضي حاجتك
---------------
يمه اگصد يالتزوره الكاظم الغيض اعتنيله
موسى بن جعفر ضريحه هوه للتايه دليله
يجبر الخاطر يسرك يجمع الخل ابخليله
تاخذ اشمتريد منه عنده چم شاره او فضيله
تحصل التريد ---- ابشباچه تكمل فرحتك
باب المراد ---- بسم الله يگضي حاجتك
---------
كلنه هالليله نطالب بالدعاء ايلم شملنه
ايوحّد الكلمه او ننادي هالعراق ايظل املنه
اخوه يجمعنه محمد قبله وحده الكل تلمنه
يبعد الشر عن وطنه خيره يشمل كل اهلنه
ادعي الامان ---- والباري يسمع دعوتك
باب المراد ---- بسم الله يگضي حاجتك
----------------------
الشاعر الحسين
السيد عدنان الحمامي
مجلة
الرواديد و الشعراء
ليست هناك تعليقات:
إرسال تعليق