أنشد عن حسين گالولي موجود
بس بسفر راح ومنتظرته ايعود
ارجه عطفه ونظرته گلبي تسعر جمرته
انشد عن حسين
ــــــــــــــــــــــــــ
انا اللي بالغرب راحت سبيه
حزينه وحايره هاي المسيه
اريد اسال هلي انة رقيه
ابوية شعجب ما يسأل عليه
ارحموا بحالتي يهل الحميه
تبعنه لو بگة بالغاضريه
يابوية يحسين من ضيمي ناديت
للكوفه والشام ما تعلم امشيت
اشكي حالي وحيرته گلبي تسعر جمرته
انشد عن حسين
ــــــــــــــــــــــــــ
اريدن والدي اعرف مصيره
خلافه گلبي من يطفي سعيره
منو يگله مست بنتك اسيره
وشعمل درب اليسر بيه ومسيره
انا البالله وببويه المستجيره
بعدني عالسبي والله صغيره
گولولي يا ناس درب الابو منين
ارد اشتكي الصار وعملاته للبين
امن السفر منتظرته گلبي تسعر جمرته
انشد عن حسين
ــــــــــــــــــــــــــ
اريد اشكيله عن روحي والمهه
واگله الدنيا بعدك مر طعمهه
واگله العيلتك انظر حرمهه
وحيده ابلا ولي راحت زلمهه
تعال اسمع سكينه شتحچي لامهه
تنوح وخايفة وتريد عمهه
والسكنه ظل صوت يجرح كل احساس
كل ساعه وتصيح يا عمي عباس
يا مصيبه اخرته گلبي تسعر جمرته
انشد عن حسين
ــــــــــــــــــــــــــ
اخبره عن محن صعبه واليمه
يتامه وبالفله تهنه هضيمه
بگينه ابلا كفيل وبلايه خيمه
وزجرنه الظالم بصوت الشتيمه
تلمنه عمتي وتنادي الظليمه
وتحير ابچم يتيم وچم يتيمه
وبنار الاحقاد حرگوهه الخيام
مفزوعه وتنوح خلوهه الايتام
صدري ضاگت حسرته گلبي تسعر جمرته
انشد عن حسين
ــــــــــــــــــــــــــ
لابويه اريد اسولفله الهوايل
الضعن ظل بس يتامه وبس ارامل
بدينه حطوا اگيود وسلاسل
وعلي السجاد يمشي وظهره مايل
انسبينه والحرم تبچي وتسائل
اخونة حسين وينه وابو فاضل
وبحر الشموس مشونه حفاي
عطشانه الاطفال ابحسرة الماي
بعينه كلمن عبرته گلبي تسعر جمرته
انشد عن حسين
ــــــــــــــــــــــــــ
شكيت لوالدي ذيچ النوايب
غريبه ساكت وعن بته غايب
يعمه ما يرد مهما اخاطب
يزينب ردي تكفيني المصايب
اظنهه دمعتج عنچ تجاوب
واظنه ابكربله ظل عالترايب
يا عمتي راح ما فارگ النوح
ثاري بالطفوف والدنه مذبوح
ما يرد من سفرته گلبي تسعر جمرته
انشد عن حسين
الشاعر الحسيني
أنيس الخفاجي الكربلائي
حلوة
ردحذف