خويه رديت الك كوم ونوّخ ناگتي
ها يعباس أريدك تشاهد حالتي
_ _ _ _ _ _ _ _ _ _
خويه هاليوم اجيتك عكب غيبة سبي
مامش اجدام يعباس اجيت احبي حبي
سلت الروح بالغياب كصدت ابمعتبي
ابطرك الثياب وصلتك يخويه ومعصبي
انهض يغالي .. شوف الجرالي
ويه الايتام مشيت واجيت ابلوعتي
ها يعباس اريدك تشاهد حالتي
_ _ _ _ _ _ _ _ _ _
ويه الايتام اجيتك شسولف ياجرح
شبتدي وياك شكلك يموتني الشرح
بالطشت من شفت راس اخوك المنذبح
رغم الخضاب احس بيه مثل شمس الصبح
شمسه زهيه .. روح الزجيه
لاچن ايزيد تقصد تزود امصيبتي
ها يعباس اريدك تشاهد حالتي
_ _ _ _ _ _ _ _ _ _
اتقصد ايزيد اذيتي ودليلي يهضمه
يظرب اشفاه اخويه ابعصاته ويشتمه
شفاهه تدري يعباس تفطرن بالضمه
لمن ايزيد ظربهن غدن يجرن دمه
صوب دليلي .. وهدملي حيلي
عيني تشبح عليك وتهل ابدمعتي
ها يعباس اريدك تشاهد حالتي
_ _ _ _ _ _ _ _ _ _ _ _
خويه لوريد اخبرك عليه اللي جره
تنفض اتراب ضريحك تعيد الكنطره
جنت اريدك يعباس دليله اتجبره
اعتب اشلون واشوفن جفوفك عالثره
انسه عتابي .. ولوعة مصابي
واصرخ ابصوت يعباس متخمد جمرتي
ها يعباس اريدك تشاهد حالتي
_ _ _ _ _ _ _ _ _
خويه عباس دليلي بمصابك جن جمر
شحمل امصاب والغياب يهد طود الصبر
شكفل ايتام والاحلام تفانت باليسر
انطر اتعود يعباس لجني اشأنتظر
آنه سبيه .. وأنته ابمنيه
هذا الفراك يعباس يكطع جبدتي
ها يعباس اريدك تشاهد حالتي
الشاعر الحسيني
عمار العيساوي الكربلائي
ليست هناك تعليقات:
إرسال تعليق