(( نوح الحوراء))
بمناسبة أربعين الإمام الحسين - عليه السلام
غريبه بت علي هاليوم محتـاره ... تدوّر كَبر اخـوها تريــــد اخباره
عله المذبوح ... تون وتنوح
تدوّر كَبر اخوها تريد اخباره
************
رجع ضعن حسين شــــــايل بالهظم احزانه
يشـــــكي لوعات اليســــر ويصيـح ياوليانه
اليوم إِجينه اوجبنه روس الأهل تنعي ويانه
ننشـــد إِعله كَبور اهلنه اونسئل إِعله حمانه
نحن حن الهجن للطاح عالغبره ... نريد إِنهل دمعنه الليــله يم كَبره
تشوغ الروح ... تون وتنوح
تدوّر كَبر اخوها تريد اخباره
************
جتّي أُم الحـــــزن زينب تنحب اومهضومه
تصرخ إِبصوت النــوايب حايره اومهمومه
تريد اخوها العافته مطروح وســـط الحومه
تنــادي وين أهل الرحم دلوني شنهو علومه
عفت أنه أخـويه مخضّب إِبدمه ... ولا خـــلوني انوحن ونتحب يمه
إِبدمه منالموح ... تون وتنوح
تدوّر كَبر اخوها تريد اخباره
************
طاحت إِعله الكَبُر بنت المرتضه وتنــــادي
خويـه ياريع الكلُب فكَــدك شـــــعبلي افادي
ريت عُكبـــك لاعشت يحســـين يبن الهادي
ولاأشـــوفك يبن ابويه أموسّــــد بالهالوادي
صُفت جمرة إِمصابك بيّه لهابه ... وصيحن كل وكت يحسين ومصابه
بكلُب مجروح ... تون وتنوح
تدوّر كَبر اخوها تريد اخباره
************
كَامت الصوب الشــــــــــريعه تنشد الكافلها
ساعه توكَع ساعه تنهض والغُصص تحملها
وعله جرح الكلُب داسـت كَامت إبســد ظِلها
حُرّه دوهنا الدهر ومصـاب اخــــــوها شلها
إِجت أُم الخـــدر هاليوم ممتحنه ... تناشــــد عالكفلها أوتشهك ابونّه
بنظر مشبوح ... تون وتنوح
تدوّر كَبر اخوها تريد اخباره
************
كَعدت إِعله النهر تنشـــــــد وين حامي ضعونها
شلون يرضه الشمر يضرُب سْوطه فوك امتونها
ليش ماكَام ابو الغيره للـــذي ايشــــــــــــتمونها
يكَلُب ابســـــيفه الوطيه ايحاســـب اليــــــاذونها
يهيد نار كلبي ايبرد احشـــــايه ... اويســـكنلي دليلي ايخفف ابچايه
بدمع مسفوح ... تون وتنوح
تدوّر كَبر اخوها تريد اخباره
************
شـــــــلون ارد لارض المدينه لوحدي ياوالياني
شرد اكولن للنشــــــــــــــــــد عنكم اذا حاجاني
من بعدكم طاح عزمي اوضاع عزي اوشــــاني
بعد عباس البطل جـــــــــــــــار الوكت واذاني
حرت والله بزمان وشدت اعيالي ... ولا واحد بعدهم يرحم ابحـالي
بجسد مطروح ... تون وتنوح
تدوّر كَبر اخوها تريد اخباره
************
الشاعر الحسيني
سعد مطلوب الخفاجيِ
ليست هناك تعليقات:
إرسال تعليق