هالليلة جبريل تعنه وروحه ملهوفه
يواسي بمصاب الجواد بدمعه مذروفه
بالحسرة والاه ينادي وينعه باحزانه
عرش الله من المصيبة اهتزت اركانه
""""""""""""""""""
صرخ ناعي المنية بلوعة وبحسرة
نعه فگد الجواد وتاسع العترة
بالم روح الامين وحالة منكسرة
نزل بالفاجعة يواسي الوصي بعبرة
ما يحمل الهم جرت بالحسرة دمعاته
سودة وحزينة مست منكوسة راياته
ارض الله تنعه وسماهة وتبچي اكوانه
وعرش الله من المصيبة اهتزت اركانه
"""""""""""""""""""
الجواد الليلة غايب والحزن خيّم
انخطف لون السمه وصار الفلك اظلم
السموات السبع تنعه الفجيعة ابهم
بگه دمع المَلَك يجري علي من دم
بحر النوايب بگت تتلاطم امواجه
شيرده باب المراد وگاضي الحاجه
طاح وخذاه الاجل ظل غافي باحضانه
وعرش الله من المصيبة اهتزت اركانه
""""""""""""""""""
هتف صوت المَلَك بالفاجعة وكبّر
عجايب هالدهر ظل بالعكس يفتر
صعب حال الوصي والاصعب المنظر
وحيد ابهمه ذايب چبده واموذر
بغدر وخيانة وخديعة ونته مسموعة
يشكي مصاب الالم بالحسرة واللوعة
ممرودة چبد الجواد وتغلي نيرانه
وعرش الله من المصيبة اهتزت اركانه
"""""""""""""""""
الاسى لآل النبي ميفارگ بطبعه
فجعهم بالجواد وهاجت الدمعه
صعب فگده وحزينة فاطمة البضعه
وخبر هذا المصاب لحيدر يفجعه
هم الجره والالم ظل بالگلب راسي
روح الامين لعلي ولفاطمة يواسي
ويواسي اهله بمصابه وروحه حيرانه
وعرش الله من المصيبة اهتزت اركانه
"""""""""""""""""""
الرجس رد هالمسيه والظلم عاده
وطفه نور الجواد بسمه واحقاده
ظلم صاح المَلَك وبحسرته ناده
گضه بالسم مثل اولاده واجداده
بسم النوايب گضوا كل اهله كل آله
بس جده بالطف ذبيح امگطعه اوصاله
گطعوا وريده ووتينه وتبچي وليانه
وعرش الله من المصيبة اهتزت اركانه
""""""""""""""""""
جواد آل النبي طاح وغمض عينه
كتاب الله يندبه وكل مضامينه
انغدر تاسع وصي وتاسع براهينه
انطفت شمعة حياته وخلصت سنينه
ما تطفه نار المصيبة يصعب غيابه
مفجوعة اهل السمه هالليلة بمصابه
كل ايه تنعه الجواد وينعه قرانه
وعرش الله من المصيبة اهتزت اركانه
**************************
الشاعر الحسيني
أنيس الخفاجي
مجلة
الرواديد والشعراء
ليست هناك تعليقات:
إرسال تعليق