بفگد الحبايب نفس المصايب
بالصادق انعاد ظلم النواصب
""""""""""""""""""""""""
هاج حزني ووجرت جمرة عذابي
بالمصاب الليلة چن انظر مصابي
الحرگ بابك حرگ بايدينه بابي
ونفسه ايده الّلي اگطعت زهرة شبابي
نفس الظليمة يبني هظيمة
مكتوبة الاقدار والمن نعاتب
""""""""""""""""""""""""
صورة يا صادق شفت صعبة وعجيبه
دارك ابنار الرجس يسعر لهيبه
اتذكرت داري وصحت والله غريبه
بدارك وداري جرت نفس المصيبه
العترة الشريفة وآل السقيفة
نتخاصم هناك والله اليحاسب
"""""""""""""""""""""""""
دمعة اعيالك احسهة بگلبي تلهب
ذكرتني من طحت واعيالي تنحب
حرت يا موقف اشد يا محنة اصعب
ذكرتني ابدمعة المهظومة زينب
زينب حزنهة نشّف جفنهة
ولحالي بالاه ظلت تراقب
""""""""""""""""""""""""
چني اشوف بمنزلك هالليلة حيدر
تنشد الحال الاهل فكرك تحيّر
صرخة اطفالك تدّوي بويه احضر
شفتك بصورة علي ودلالي يسعر
تصرخ بنينك يا بويه وينك
جدك علي شاف هاي النوايب
""""""""""""""""""""""""
راضع اويه ابليس ما تدري الخليفه
وبالرذيلة والغدر اصبح حليفه
نطفته مو طاهرة والله ونظيفه
يبني يالصادق هذوله اهل السقيفه
نكروا نبينه وطبروا علينه
من هاي الارجاس شفنه العجايب
""""""""""""""""""""""""
ارد اسألك مِن اشد من هاي الالام
ناري لو نارك اشد لو نار الاخيام
حالي لو حالك صعب لو حال الايتام
لو مصايب كربله والكوفة والشام
چم شدة اصعب شافتهة زينب
مسبية وتصيح لا من يجاوب
""""""""""""""""""""""""
ادري يبني امصيبتك صعبة ومريعه
لكن انظر كربله وشوف الفجيعه
شلون ذبحوا جدك احسين ورضيعه
شلون عمك دامي ظل يم الشريعه
لجدك ذكرته گلبي فطرته
مذبوح ومسموم حال الاطايب
الشاعر الحسيني
أنيس الخفاجي الكربلائي
مجلة
الرواديد و الشعراء
ليست هناك تعليقات:
إرسال تعليق